Spilliforrit geta valdið miklu tjóni

28.01.10

„Ef við lítum á tölfræðina frá stærstu vírusvarnarframleiðendunum þá höfðu þeir á rúmlega 20 árum fundið samtals 20 milljón mismunandi spilliforrit. Þar af kom helmingurinn, 10 milljónir, í ljós á síðasta ári,“ segir Kristinn Guðjónsson, hópstjóri upplýsingaöryggis hjá Skyggni í samtali við Morgunblaðið. Í sérblaði Morgunblaðsins fimmtudaginn 28. janúar, segir að aldrei hafi fyrirtæki þurft að huga eins vel að öryggi tölvukerfa og nú og ekki þarf aðeins að verjast spilliforritum sem lamað geta starfsemina heldur einnig hreinum og klárum innbrotum í tölvukerfin og þjófnaði á trúnaðargögnum. „Hættan margfaldast með hverju árinu enda felast hagsmunir tölvuþrjótanna í að ná fram sem mestum hagnaði eða valda sem mestu tjóni. Þetta geta verið óprúttnir einstaklingar, heilu glæpasamtökin og jafnvel stjórnvöld ríkja sem standa á bak við alls kyns árásir,“ segir Kristinn. „Aðferðirnar verða flóknari og fullkomnari í hvert sinn og ekki er ósennilegt að til viðbótar við þessi 20 milljón spilliforrit sem fundist hafa hingað til sé einnig verulegt magn spilliforrita sem hafa sloppið framhjá greiningartækjum vírusvarnafyrirtækjanna.“

Kristinn segir þjónustu hýsingarfyrirtækis eins og Skyggnis vera góðan valkost fyrir fyrirtæki í dag. „Við notum vottaðan búnað, vinnubrögð og öryggisstaðla til að tryggja öryggi eins og frekast er unnt, auk þess sem við beitum ýmsum aðferðum við eftirlit, til dæmis til að geta séð strax ef gerð er tilraun til að brjótast inn í tölvukerfi viðskiptavinar, brugðist við og rannsakað árásina,“ segir hann.. „Við erum með öfluga eldveggi og aðskilið netkerfi til að auka enn frekar á öryggið. Þá bjóðum við þann möguleika að fylgjast með nethegðun og getum boðið upp á síun til að koma í veg fyrir óæskilega og jafnvel hættulega netumferð starfsmanna,“ segir Kristinn í samtali við Morgunblaðið.